Let
asb. daarop dat hierdie 'n ongeredigeerde weergawe van die oorspronklike
lering is en die eerste en lateres, sal weldra ook geplaas word - daar word ook
nog ernstig gedink aan beter vertalings vir die verskillende karakters se name
- voorstelle sal verwelkom word
DIE PELGRIM SE REIS ~ 15
(Pelgrim Onderwerp aan Dissipelskap)
p.46-52 of
p.48-53 of p.56-61
1. INLEIDING:
Ons het die vorige keer gesien hoe dat “Waaksaam”
vir “Pelgrim” aan sommige van die ander inwoners van die “Pragtige Paleis”
voorgestel het, waarna “Waaksaam” ‘n onderhoud met hom gevoer het. Ons gaan nou sien hoe dat drie volwasse
gelowiges ‘n, pad van Dissipelskap met “Pelgrim” begin loop. Eerste aan die beurt is “Godsvrug” (“Piety”).
Lees p.46-48 of 48-50 (1) of 56-58
Ons lees in Matt.28:19-20 ~ Gaan dan na al die nasies toe en maak die mense my
dissipels: doop hulle in die Naam van die Vader en die Seun en die Heilige
Gees, en 20 leer hulle om alles te onderhou wat Ek julle beveel
het. En onthou: Ek is by julle al die dae tot die voleinding van die wêreld.”
Ons moet dan eerstens vir onsself afvra: “Wat is ‘n Dissipel?”
Ten aanvang moet ons ook net kyk na Luk.6:40
~ ’n
Leerling is nie hoër as sy leermeester nie, maar iemand wat volleerd is, sal
aan sy leermeester gelyk wees.
2.
DISSIPELSKAP – “GODSVRUG”:
Ons moet tweedens vir onsself vra: Hoe word ‘n dissipel gemaak?
Deur
openbare prediking en lering van die Woord ~
Maar hoe kan ’n mens Hom aanroep as jy nie in Hom glo nie? En hoe kan jy
in Hom glo as jy nie van Hom gehoor het nie? En hoe kan jy van Hom hoor sonder
iemand wat preek? 15 En hoe kan iemand preek as hy nie gestuur is
nie? Daar staan ook geskrywe: “Hoe wonderlik klink die voetstappe van dié wat
die goeie boodskap bring” (Rom.10:14-15).
Deur individuele
of privaat bediening van die Woord. Hier
moet ook daarop gelet word, dat hierdie die verantwoordelikheid van elke
gelowige is, deurdat hy/sy, nie net sal praat daaroor nie, maar
dit ook sal voorleef, want dit is hoe dissipels gemaak word – d.m.v.
verhoudinge. Daar moet dus tyd spandeer
word met mekaar.
Paulus is vir ons hier
’n voorbeeld – Hy het bv. nooit alleen gereis nie. Sy dissipels het op informele wyse van hom
geleer, deurdat hulle hom voortdurend gesien het en na hom geluister het – aan
die anderkant kon hulle ook dinge doen wat hy nie kon nie en sodoende hom weer
gehelp. Hy het hulle dus voortdurend
opgelei. Daarom is “fellowship”
(gemeenskap van die gelowiges) so geweldig belangrik - ook t.o.v. nuwe lidmaat aansoeke – ons moet
weet hoe hierdie nuwe aansoeker in sy huis leef; met sy vrou en met andere ens.
Hoe kan jy sien hoe
iemand anders lewe? Net as jy tyd
spandeer met daardie persoon.
Ouers: Kan u nou sien watter geweldige verantwoordelikheid
u teenoor u kinders het en hoe ontsettend belangrik dit is hoe u vóór u kinders
leef.
Kom ons kyk hier na
enkele Skrifgedeeltes ten einde hierdie punt te ondersteun ~ Hy het toe twaalf, wat Hy
apostels genoem het, aangestel om by Hom te bly... (Mark.3:14a) en hiermee saam, Joh.13:15 ~ Ek het vir julle ’n
voorbeeld gestel, en soos Ek vir julle gedoen het, moet julle ook doen.
Fil.4:6 ~ En wat
julle van my geleer en ontvang het, en gehoor en gesien het, dit moet julle
doen. En God wat vrede gee, sal by julle wees (sien ook Hand.4:13;
1Tes.1:5-6).
Om saam te vat dan – Dissipelskap vind plaas tydens
en met openbare prediking en lering van die Woord (tydens die erediens dus) en tweedens
vind dissipelskap plaas tydens individuele en/of privaat bediening van die
Woord.
Ons het gesien dat “Pelgrim” eerstens”
onderwerp word aan dissipelskap deur “Godsvrug” (“Prudence”). Die Griekse woord vir “Godsvrug”, is “Eusebius”. (Hou in gedagte dat Bunyan name gee aan die
mense wat ’n pad van dissipelskap loop met “Pelgrim” - name wat die drie
belangrikste eienskappe in ’n gelowige se geloofslewe is). Die eerste van hierdie eienskappe is dan Godsvrug.
Wat beteken Eusebius? Eusebius of te wel “Godsvrug” dui op:
Lojaliteit; Toewyding; Respek; Getrouheid; Eerbied en ’n Godvrugtige lewe. Hierdie eienskappe word verskeie kere in die
Nuwe Testament vermeld – bv. Titus
2:11-12 ~
Die genade van God wat verlossing bring,
het immers aan alle mense verskyn. Dit voed ons op om die goddelose leefwyse
en wêreldse begeerlikhede te laat vaar en met selfbeheersing, opregtheid en
godsvrug in die teenswoordige wêreld te lewe.
Dit
word bv. 15 keer in Paulus se sendbriewe vermeld (sien o.a. 1Tim.2:1-2, 10; 3:16; 4:7-8; 5:4;
6:3-6; 2Tim.3:5,12; Titus 1:1). Dit word
ook verskeie kere in Petrus se tweede Sendbrief vermeld, bv.: 2Pet.1:3-5,7 ~ Sy Goddelike krag het ons alles geskenk wat
ons nodig het om te lewe en Hom te dien. Dit kom deurdat ons Hom ken wat ons
geroep het deur sy heerlikheid en mag. Deur dit te doen, het Hy ons die
kosbaarste en allergrootste gawes geskenk wat Hy belowe het. Daardeur kan julle
die verderf ontvlug wat deur begeerlikheid in die wêreld werksaam is, en deel
kry aan die Goddelike natuur. En juis om
hierdie rede moet julle alles in die stryd werp om julle geloof te verryk met
deugsaamheid, die deugsaamheid met kennis, die kennis met selfbeheersing, die
selfbeheersing met volharding, die volharding met godsvrug, die godsvrug met
liefde onder mekaar en die liefde onder mekaar met liefde vir alle mense (sien ook 2Pet.3:11).
“Godsvrug”
loop dan ‘n pad van dissipelskap met “Pelgrim” en sy vra feitelike vrae, maar
terselfdertyd vrae wat maklik beantwoord kan word – dit is dan ook uiteraard
wat ons moet doen wanneer ons ‘n pad van dissipelskap met iemand loop.
Net voor ons verder
gaan: Hoe verklaar ons die feit dat
“Pelgrim” (’n man) hier deur ’n vrou geleer word – dit is tog nie Bybels
nie? Onthou, Bunyan verwys hier na die
kerk (korporatief) en daar word in die Woord na die kerk, as Christus se Bruid
(vroulik) verwys en die dissipelskap word dus deur die Bruid van Christus
hanteer, daarom dat hy vroulike name gebruik – verwysende na die Bruid van
Christus.
Sy maak dus gebruik van die
“Vraag-en-Antwoord- metode”:
Wat het daartoe
aanleiding gegee dat jy na Christus begin soek het?
Hoe het dit gebeur dat
jy jou land verlaat het en hierheen gekom het?
Het jy dan nie by die
Huis van “Uitlêer” verby gegaan nie?
Het die “Man met die
verskriklike droom” vir jou vertel van sy droom?
Was dit al wat jy in
“Uitlêer” se huis gesien het?
Wat het jy nog gesien op
jou reis tot dusver?
Ons sien dat “Godsvrug”
verskeie dinge geleer het n.a.v. die vrae wat sy vir “Pelgrim” gevra het:
Dat “Pelgrim” uiters
bekommerd was oor God se haat en oordeel oor sonde.
Hy het sy tuisdorp
verlaat, omdat dit God se wil was.
Hy verstaan nie regtig
wat die rol van God se soewereiniteit speel in die reddingsproses nie – die
uitverkiesing dus.
“Pelgrim” was baie diep
geraak deur die dinge wat hy in “Uitlêer” se huis gesien het – bv. die “Vuur
teen die muur”; die “Man in die Ysterhok”; die “Man met die Verskriklike
Droom”; die “Pragtige Paleis” ens.
Dat “Pelgrim” ’n
geweldige begeerte gehad het om meer van God se waarheid te leer.
Dat “Pelgrim” oortuig
was van die feit dat die mens se enigste hoop op verlossing van sy sondeskuld
en wegwerplikheid voor God, geleë is in die soendood van Jesus Christus aan die
kruis op Golgota.
Dat “Pelgrim” alreeds
die vermoë begin ontwikkel het om te onderskei tussen ware geloof en vals
geloof.
Dat “Pelgrim” reeds ’n
mate van verantwoordelikheid begin beleef om mense te waarsku en/of te berispe,
wat ’n vals sekuriteit en hoop op ’n ewige lewe, koester
Dat gelowiges
onvermydelik, swaar tye in hierdie wêreld en hulle Christelike lewe sal beleef.
Dat “Pelgrim” erken het dat hy nie oor die vermoë beskik
om die lewe van ’n Christen te leef, sonder die hulp van God en ander gelowiges
nie.
Dat “Pelgrim” die wyse waardeer, waarop God hom tot nou beskerm
het en vir die wyse waarop hy ontvang is in die Liggaam van Christus (die kerk).
Waarom het “Godsvrug” hierdie vrae aan Pelgrim gevra en
waarom moet ons dieselfde vrae aan nuwe dissipels vra?
Om die egtheid van “Pelgrim” se getuienis te bepaal – m.a.w.
sy wi; seker maak of hy werklik wedergebore is (“is hy deur met die Here?”).
Om die vlak of diepte van sy geestelike begrip en
volwassenheid in die Here te bepaal, ten einde vas te stel watter tipe lering
hy nodig het – Dit laat ’n mens dink aan die woorde in Spr.18:13 ~ Wie antwoord voor hy die
vraag gehoor het, is dwaas en kom in die skande.
T.w.v. van “Godsvrug” se eie geestelike groei en dit seën
haar om iemand anders se getuienis te hoor.
T.w.v. “Pelgrim” se eie beswil, want dit versterk ook sy
eie geloof.
3.
DISSIPELSKAP – “WYSHEID”:
Ons volgende lidmaat wat ‘n pad met “Pelgrim”
loop, is “Wysheid” (“Prudence”) en wysheid is dan ook die tweede belangrike
eienskap van ’n gelowige se geloofslewe.
Lees p.48-49 of 50-51 (2) of 58-59
‘n Baie belangrike Bybelse eienskap wat hier
in gedagte gehou moet word, tref ons o.a. aan in Spr.18:15 ~ ’n Mens met insig doen
kennis op; wyse mense hou hulle ore oop vir kennis. Spr.13:16 ~ Alles wat ’n verstandige mens doen, word met
kennis gedoen; wie nie wysheid het nie, begaan een dwaasheid na die ander. Spr.15:5 ~ ’n Dwaas verag wat sy vader hom leer; wie hom
laat teregwys, is verstandig. Spr.19:14
~ Van
sy ouers kan iemand ’n huis en besittings erf, maar ’n verstandige vrou is ’n
geskenk van die Here. Spr.27:12 ~ ’n Verstandige mens sien onheil kom en sorg
dat dit hom nie tref nie, onervare mense loop oop oë daarin en boet daarvoor.
’n Baie belangrike Bybelse kwaliteit wat ons ook in
gedagte moet hou, wanneer dit kom by die dissipleskapspad wat “Wysheid” met “Pelgrim”
geloop het, is o.a. díé wat ons aantref in 1Tim.3:2 ~ ’n Ouderling moet onberispelik wees, getrou aan sy vrou, nugter,
verstandig, beskaaf, gasvry en bekwaam om te onderrig.
Ook 1Tim.2:9,15 ~ Van die vroue wil ek hê dat hulle ook in
hulle kleredrag waardig, beskeie en ingetoë moet wees. Hulle versiering moenie
haarkapsels en goud of pêrels of duur klere wees nie, 15 Maar sy
sal haar redding vind in moederskap, as sy maar volhard in geloof, liefde en ’n
heilige lewe, en daarby beskeie bly. Titus 2:2,5,6 ~ Sê vir die ouer mans hulle moet nugter wees,
eerbaar, verstandig, gesond en vas in geloof, liefde en volharding. 5 verstandig
en kuis, goeie huisvrouens, onderdanig aan hulle mans. Dan sal die woord van
God nie in diskrediet kom nie. 6 Net so moet jy die jonger mans
vermaan om hulle verstandig te gedra. Mark.5:15 ~ Toe hulle by Jesus kom en die besetene in wie die baie bose geeste was,
daar sien sit met sy klere aan en by sy volle verstand, het hulle groot geskrik.
Rom.12:3 ~ Kragtens die genade wat aan my gegee is, sê
ek vir elkeen van julle: Moenie van jouself meer dink as wat jy behoort te dink
nie. Nee, lê jou liewer daarop toe om beskeie te wees in ooreenstemming met die
maat van geloof wat God aan elkeen toebedeel
het.
Wat dan beteken “Wysheid” se naam
dan regtig? En wanneer ons daarna kyk,
moet ons die betekenis van haar naam koppel aan dit wat sy in haar dissipelskap
van “Pelgrim”, aan hom geleer het – m.a.w., hierdie is kwaliteite wat ’n
Christen oor behoort te beskik en wat ons vir ’n nuwe dissipel moet leer.
“Wysheid” se naam beteken dan o.a.:
Om in beheer van jouself te wees –
die teenoorgestelde van impulsiwiteit dus.
Om wys te wees – Die teenoorgestelde
is dus om onverstandig te wees
Om wyse besluite te neem – Om m.a.w.
goeie oordeel aan die dag te lê
Om gewilig te wees om te luister –
“Pelgrim” weet dus hy het baie om te leer.
Neem besluite wat gebaseer is op
feite.
Beoordeel op grond van feite
Om vooruit te dink – antsipeer
Voorbeelde van wysheid:
Barnabas in Hand.11:19-26 ~ Deur die vervolging wat na Stefanus se dood ontstaan het, is die
gelowiges uitmekaar gejaag. Party van hulle het na Fenisië, Siprus en Antiogië
toe gegaan, maar hulle het die woord aan niemand anders as net aan Jode verkondig
nie. 20 Onder die vlugtelinge was daar sekere mense wat van Siprus
en Sirene afkomstig was en wat in Antiogië gekom en daar ook aan die
Griekssprekendes die evangelie dat Jesus die Here is, verkondig het. 21 Die
Here het die gelowiges gehelp, sodat daar baie mense tot geloof gekom en hulle
tot die Here bekeer het. 22 Die berig hieroor het die gemeente in
Jerusalem bereik, en hulle het vir Barnabas na Antiogië toe gestuur. 23 Toe
hy daar kom, was hy bly om te sien hoe God in sy genade onder hulle gewerk het,
en hy het hulle almal aangespoor om met hart en siel aan die Here getrou te
bly. 24 Barnabas was ’n goeie man, vol van die Heilige Gees en met
’n vaste geloof. ’n Aansienlike groep mense is tot geloof in die Here gebring, 25
en Barnabas is na Tarsus toe om vir Saulus te gaan soek. 26 Toe
hy hom kry, het hy hom na Antiogië toe gebring, en hulle twee het ’n hele jaar
lank saam in die gemeente gewerk en baie mense onderrig. In Antiogië is die
gelowiges die eerste keer Christene genoem.
Paulus in Hand.16:1-3 ~ Paulus het in Derbe gekom en daarna in Listra. Dáár was ’n gelowige met
die naam Timoteus. Sy ma, ook ’n gelowige, was ’n Joodse vrou en sy pa ’n
Griek. 2 Die gelowiges in Listra en Ikonium het net goed van hom gepraat.
3 Omdat Paulus vir Timoteus met hom wou saamneem, het hy hom
besny. Dit het hy gedoen ter wille van die Jode wat in daardie gebied gewoon
het, want hulle het almal geweet sy pa is ’n Griek. Paulus
het in sy wysheid geweet, dat
indien die onbesnyde (sy pa was ’n Griek) gelowige Timoteus (sy ma was ’n
gelowige), onder die Jode wou werk, sou hy besny moes wees.
Sien ook vir Aquilla en Priscilla in Hand. 18:24-26; Moses
in Hebr.11:24-26; Josef in Gen.39 en Die Jongman in Spr.7:6-23.
Waarom is wysheid so ’n belangrike eienskap vir ’n
gelowige?
Sonder wysheid kan ’n gelowige maklik op ’n syspoor gelei
word.
Sonder wysheid kan ’n gelowige baie maklik misverstaan
word.
Sonder wysheid kan ’n gelowige nie gerespekteer word nie.
Kom ons kyk ‘n bietjie na die vrae wat “Wysheid”
vir “Pelgrim” gevra het:
Wat
dink jy van jou vorige lewenswyse?
Hierdie is ‘n diep vraag en die antwoord kan vir “Wysheid” baie dinge
t.o.v. “Pelgrim” openbaar.
Verag
en verwerp jy jou vorige lewe? Die insig
wat hier verkry kan word, is o.a. om te sien of “Pelgrim” werklik insig het in
sy vorige verlorenheid en hoe God sonde werklik sien en voel daaroor.
Ervaar
jy ooit vryheid van ‘n innerlike stryd met vleeslike en wêreldse gedagtes?
Wanneer
jy oorwinning ervaar – wat help jou die meeste en wat se betekenis hou so ‘n
oorwinning vir jou in?
Wat
motiveer jou om te volhard in jou Christelike lewe?
Wat is
die rede, waarom jy so entoesiasties en vol ywer voort beur om by die Berg Sion
uit te kom?
Ons sien deur hierdie vrae van “Wysheid”, dat
sy baie meer diepgaande en ondersoekende vrae as “Godsvrug” gevra het en sy
weet, dat “dit wat buite is, ook binne is”, m.a.w. dat dit wat innerlik
gedeponeer is, ook uiterlik sal manifesteer.
En deur haar vrae aan “Pelgrim”, is hy ook
weer gemotiveer om diep na te dink oor sy eie geloof en oortuigings en in die
proses word sy oortuigings net nog meer vasgelê.
4.
DISSIPELSKAP – “LIEFDE”:
Laastens word “Pelgrim” deur “Liefde”
(“Charity) gehelp op sy pad van dissipelskap.
Lees p.49-50 of 52-53 (2) of 59-61
‘n Volgende baie belangrik eienskap vir ‘n
gelowige se lewe, is liefde. Dit is
interessant om te sien dat die Hebreeuse woord vir liefde, meer as 500 keer
voorkom in die Ou Testament, bv. Eks.20:6 ~ ...maar Ek betoon my liefde
tot aan die duisendste geslag van dié wat My liefhet en my gebooie gehoorsaam (bha - aw-hab') – sien ook
Deut.6:4-5; Lev.19:18; Deut.7:9; 10:12; 11:1; 30:6 ens.
En in die Nuwe Testament
kom die woord “liefde”, meer as 370 keer voor, bv. 1Tim.1:5 ~ Die doel van hierdie opdrag is om liefde te wek wat uit ’n rein hart, ’n
goeie gewete en ’n opregte geloof kom. 1Pet.2:17 ~ Julle moet alle mense
respekteer en julle medegelowiges liefhê. Vrees God. Eer die keiser (sien
ook: Rom.8:28; Kol.3:12-14; 1Kor.8:3,13; 1Pet.1:8,22; Jak.1:12; Matt.22:37-40;
Luk.10:25-37 en Joh.13:34-35).
As ons dus sien dat die
begrip “liefde”, meer as 870 keer in die Woord gebruik word, dan kan dit nie anders as om
vir ons te sê hoe ‘n belangrike begrip en eienskap dit in die gelowige se lewe
is nie. Net in 1Joh.3 en 4 alleen, word
die woord “liefde” 35 keer gebruik.
Voorbeelde van Bybelse liefde:
Liefde is om te doen – Bv. die 12 dinge wat in
Lev.19:9-18 vermeld word ~ “Wanneer julle julle lande afoes, moet julle nie die
wenakkers afoes nie en ook nie die are wat bly lê, agterna optel nie. 10
Julle moet ook nie die wingerde ’n tweede keer oes of die korrels wat
val, optel nie. Laat dit alles bly vir die armes en die vreemdelinge. Ek is die
Here julle God. 11 “Julle mag nie steel nie en julle mag nie
lieg of mekaar bedrieg nie. 12 Julle mag nie ’n vals eed aflê in
my Naam en so die Naam van julle God ontheilig nie. Ek is die Here. 13 “Jy
mag nie jou naaste uitbuit of hom beroof nie. Jy mag nie ’n dagloner se loon
terughou tot die volgende dag nie. 14 Uit eerbied vir jou God mag
jy nie ’n dowe vloek of ’n hindernis in die pad van ’n blinde lê nie. Ek is die
Here. 15 “Jy mag nie onregverdig wees in die regspraak nie: jy mag
nie partydig wees vir dié wat geen aansien het nie of die vooraanstaande
bevoordeel nie. Oordeel regverdig oor jou naaste. 16 Jy mag nie
loop en skinder nie, jy mag nie jou medemens se lewe in gevaar stel nie. Ek is
die Here. 17 “Jy mag nie haatdraend wees teenoor jou volksgenoot
nie. Maak die geskil openlik met hom uit, moenie wat hy verkeerd gedoen het,
teen hom bly hou nie. 18 Jy mag nie wraak neem of ’n grief koester
teenoor jou volksgenoot nie, jy moet jou naaste liefhê soos jouself. Ek is die
Here. 19 “Julle moet my voorskrifte gehoorsaam. Moenie
verskillende soorte diere kruis of verskillende soorte saad in een land saai of
’n kledingstuk van verskillende soorte materiaal dra nie. Bybelse liefde is dus om te doen.
Liefde is om 1Kor.13:4-8 uit te leef ~ Die liefde is geduldig, die liefde is vriendelik; dit is nie afgunstig
nie, is nie grootpraterig nie, is nie verwaand nie. 5 Dit handel
nie onwelvoeglik nie, soek nie sy eie belang nie, is nie liggeraak nie, hou nie
boek van die kwaad nie. 6 Dit verbly hom nie oor onreg nie, maar
verheug hom oor die waarheid. 7 Dit bedek alles, glo alles, hoop
alles, verdra alles. 8 Die liefde vergaan nooit nie, maar die gawe
van profesie sal verdwyn, die gawe om ongewone tale en klanke te gebruik, sal
ophou, en dié van kennis sal uitgedien raak.
Liefde is om die Goeie Samaritaan te wees (Luk.10:25-37).
Jesus Christus is Liefde ~ “God het die wêreld so lief
gehad dat Hy sy enigste Seun gegee het, sodat dié wat in Hom glo, nie verlore
sal gaan nie maar die ewige lewe sal hê (Joh.3:16 – sien ook Rom.5:8).
Liefde is soos die man in die huwelik ~ Mans, julle moet julle vrouens liefhê soos Christus die kerk liefgehad
en sy lewe daarvoor afgelê het. 26 Dit het Hy gedoen om die kerk
aan God te wy, nadat Hy dit met die water en die woord gereinig het, 27 sodat
Hy die kerk in volle heerlikheid by Hom kan neem, sonder vlek of rimpel of iets
dergeliks, heilig en onberispelik (Ef.5:25-27).
Liefde is geestelike
volwassenes soos, “Godsvrug”, “Wysheid” en “Liefde”, wat uitreik na jong
dissipels en ’n pad van dissipelskap met hulle loop.
Liefde is om uit te reik na jou familie
Liefde is om verloregaande siele te waarsku, soos wat
“Pelgrim” gedoen het in die geval van “Mnr. Wêreldwys”, “Jabroer”, “Hardkoppig”
e.a.
Vrae wat “Liefde” vir “Pelgrim vra, is o.a. die volgende:
Het jy familie?
Waarom is hulle nie saam met jou nie?
Moes jy nie met hulle gepraat en hulle gewaarsku het nie?
Het jy vir jou familie gebid, sodat hulle onder
sondebesef sal kom?
Het jy vir hulle gesê dat jy intens besorgd is oor hulle?
Watter redes het jou familie aangevoer waarom hulle nie
saam met jou op hierdie reis gegaan het nie?
Het jou vorige onheilige lewe, jou vermoë om jou familie
te waarsku en oor te haal om saam met jou te reis, benadeel?
Was daar sonde of dinge in jou lewe wat ’n struikelblok
vir hulle kon gewees het?
Let verder daarop, dat “Liefde” bo en behalwe al die vrae
wat sy vra, nogtans vir “Pelgrim” bemoedig en aanmoedig!
Hoe het die vrae van “Liefde” verskil van díé van
“Godsvrug” en “Wysheid”? Sy het
gekonsentreer op verhoudinge – liefde en sy naaste. “Godsvrug het vrae gevra oor sy verhouding
met Jesus Christus. “Wysheid” het vrae
gevra wat handel oor wysheid, kennis ens.
“Liefde” se dissipelskapsklem val dus op die feit dat
“Pelgrim” en daarom ons ook, se verhouding met Christus, nie net bestaan uit
kennis en wysheid nie, maar ook uit verhoudinge en liefde – ons moet dus ook en
ek wil amper sê, veral ’n praktiese liefdesgemeenskap wees. Sy moedig hom dus aan om nie net te werk aan
sy verhouding met Christus nie, maar o.a. ook aan sy verhouding met sy broers
en susters en sy naaste.
Wat wou “Liefde” verder met haar vrae bereik? Sy daag “Pelgrim” daardeur uit om te dink en
te evalueer en homself te ondersoek.
5. VOLGENDE KEER:
DIE PELGRIM SE REIS ~ 16
Nogsteeds In Die
Pragtige Paleis ~ 03
p.50-52 of p.53-57 of p.61-65
